2001 წლიდან მაქვს უწყვეტი პროფესიული გამოცდილება ფსიქოლოგიისა და ფსიქოთერაპიის სფეროში.

ჩემი პრაქტიკული საქმიანობა დაიწყო განსაკუთრებული საჭიროების მქონე ბავშვებთან მუშაობით ფსიქო-სარეაბილიტაციო ცენტრში, ხოლო აკადემიური განვითარება — დიმიტრი უზნაძის ფსიქოლოგიის ინსტიტუტის კვლევით ცენტრში.

ჩემი პროფესიული გზის მნიშვნელოვანი ეტაპი იყო ფსიქოლოგთა ასოციაცია „ნდობა“, სადაც კარიერა დავიწყე კრიზისულ ხაზზე მომუშავე ფსიქოლოგად და შემდგომ გავაგრძელე საქმიანობა პიროვნული განვითარების კლუბის მენეჯერის პოზიციაზე.

2006 წლიდან ჩემი პროფესიული ინტერესები გაფართოვდა საზოგადოებასთან ურთიერთობის მიმართულებით. ამ პერიოდში დავიწყე მუშაობა თბილისის ზოოპარკში — მაშინ, როცა ეს სფერო საქართველოში ჯერ კიდევ განვითარების საწყის ეტაპზე იყო. ვიმუშავე საერთაშორისო პარტნიორებთან (WAZA), ვმონაწილეობდი გარემოსდაცვითი განათლების პროგრამებში, გავზარდეთ ვიზიტორთა ნაკადი და განვავითარეთ ვოლიერული სისტემა, ასევე შევქმენით საგანმანათლებლო და კვლევითი ცენტრი. აღნიშნული გამოცდილება შემდგომ ეტაპზე გაგრძელდა ხელმძღვანელ პოზიციაზე და მნიშვნელოვნად გაამყარა ჩემი ხედვა — როგორ ყალიბდება ღირებული და მდგრადი კავშირი ორგანიზაციასა და საზოგადოებას შორის.

საერთაშორისო გამოცდილება სომხეთში, აზერბაიჯანსა და უკრაინაში მნიშვნელოვნად გააღრმავა ჩემი ხედვა სწავლებისა და ზრდის პროცესებზე. განსაკუთრებულად აღსანიშნავია ილიას სახელმწიფო უნივერსიტეტში გატარებული წლები, სადაც პროფესიული გზა ვიცე-კანცლერის პოზიციამდე განვითარდა.

2015 წელს ჩემი პროფესიული არეალი კიდევ უფრო გაფართოვდა — დავიწყე საქმიანობა სამედიცინო მარკეტინგის სფეროში, სადაც განვავითარე სამედიცინო კლინიკების საზოგადოებასთან ურთიერთობის სტრატეგიები. ამ პერიოდშიც არ შემიწყვეტია ჩემთვის ფუნდამენტური საქმიანობა — ფსიქოთერაპია, ქოუჩინგი და ინდივიდუალური მუშაობა ადამიანებთან, ბავშვებთან და ოჯახებთან.

2018 წლიდან ჩემი მთავარი პროფესიული ფოკუსი სრულად დავუბრუნე ფსიქოთერაპიასა და პიროვნულ ზრდას. დღეს ვმუშაობ როგორც ფსიქოთერაპევტი, ქოუჩი და ტრენერი, ასევე ვარ კრიტიკული აზროვნების სკოლის დამფუძნებელი — ადამიანებისთვის, ვისაც სურს იცხოვროს ავთენტურად და ბედნიერად.